English poetry

Poets Х Biographies Х Poem Themes Х Random Poem Х
The Rating of Poets Х The Rating of Poems

Poem by Richard Gall


The Braes O' Drumlee


Ere eild wi' his blatters had warsled me down,
Or reft me o' life's youthfu' bloom,
How aft hae I gane, wi' a heart louping light,
To the knowes yellow tappit wi' broom!
How aft hae I sat i' the beild o' the knowe,
While the laverock mounted sae hie,
An' the mavis sang sweet in the plantings around,
On the bonnie green braes o' Drumlee.

But, ah! while we daff in the sunshine of youth,
We see na' the blasts that destroy;
We count na' upon the fell waes that may come,
An eithly o'ercloud a' our joy.
I saw na the fause face that fortune can wear,
Till forced from my country to flee;
Wi' a heart like to burst, while I sobbed, 'Farewell,
To the bonnie green braes o' Drumlee!

'Fareweel, ye dear haunts o' the days o' my youth,
Ye woods and ye valleys sae fair;
Ye 'll bloom whan I wander abroad like a ghaist,
Sair nidder'd wi' sorrow an' care.
Ye woods an' ye valleys, I part wi' a sigh,
While the flood gushes down frae my e'e;
For never again shall the tear weet my cheek,
On the bonnie green braes o' Drumlee.

'O Time, could I tether your hours for a wee!
Na, na, for they flit like the wind!'--
Sae I took my departure, an' saunter'd awa',
Yet aften look'd wistfu' behind.
Oh, sair is the heart of the mither to twin,
Wi' the baby that sits on her knee;
But sairer the pang, when I took a last peep,
O' the bonnie green braes o' Drumlee.

I heftit 'mang strangers years thretty-an'-twa,
But naething could banish my care;
An' aften I sigh'd when I thought on the past,
Whare a' was sae pleasant an' fair.
But now, wae 's my heart! whan I 'm lyart an' auld,
An' fu' lint-white my haffet-locks flee,
I 'm hamewards return'd wi' a remnant o' life,
To the bonnie green braes o' Drumlee.

Poor body! bewilder'd, I scarcely do ken
The haunts that were dear ance to me;
I yirded a plant in the days o' my youth,
An' the mavis now sings on the tree.
But, haith! there 's nae scenes I wad niffer wi' thae;
For it fills my fond heart fu' o' glee,
To think how at last my auld banes they will rest,
Near the bonnie green braes o' Drumlee.



Richard Gall


Richard Gall's other poems:
  1. My Only Joy and Dearie, O'
  2. The Bonnie Blink O' Mary's E'E
  3. The Hazel Wood Witch
  4. Captain O' Kain
  5. Louisa in Lochaber


Poem to print Print

922 Views



The Last Poems


To Russian version


–ейтинг@Mail.ru

English Poetry. E-mail eng-poetry.ru@yandex.ru