Poem by Geoffrey Chaucer

To Rosemounde

  A Balade

Ma dame, ye ben of al beaute shryne
As fer as cercled is the mapamonde;
For as the cristall glorious ye shyne,
And lyke ruby ben your chekys rounde.
Therwyth ye ben so mery and so iocunde
That at a reuell whan that I se you dance,
It is an oynement vnto my wounde,
Thoght ye to me ne do no daliance.

For thogh I wepe of teres ful a tyne,
Yet may that wo myn herte nat confounde;
Your semy voys that ye so small out twyne
Makyth my thoght in ioy and blys habounde.
So curtaysly I go, wyth loue bounde,
That to my self I sey, in my penaunce,
Suffyseth me to loue you, Rosemounde,
Thogh ye to me ne do no daliaunce.

Nas neuer pyk walwed in galauntyne
As I in loue am walwed and iwounde;
For whych ful ofte I of my self deuyne
That I am trew Tristam the secunde.
My loue may not refreyde nor affounde;
I brenne ay in an amorouse plesaunce.
Do what you lyst, I wyl your thral be founde,
Thogh ye to me ne do no daliance. 

1. Gentilesse
2. Chaucer's Words to His Scrivener
3. Anelida and Arcite
4. Roundel
5. Chaucer's Prophecy

Print

1793 Views

Last Poems

To Russian version