English poetry

PoetsBiographiesPoems by ThemesRandom Poem
The Rating of PoetsThe Rating of Poems

Poem by William Hamilton Reid

Monody on the Death of Robert Burns


Melpomene, thou mournfu’ muse,
Dinna to aid me now refuse,
My paper mony a tear bedews,
	My heart’s like lead,
Now while I write the waefu’ news,
	That Robin’s dead.


For sterling genius, blyth and free,
Fam’d Robin’s match when shall we see?
Ye sons o’ music rise and gie
	A waefu’ screed,
The pith and saul o’ mirth and glee
	Wi’ Burns are fled.


Ye lasses, gathering heather bells,
By Scotia’s mosses, glens, or sells,
Ye bardies “crooning to yoursels”
	By burn or brae,
Echo thro’ a’ her hills and dells
	The sang of wae.


He sang of nature’s “foggage green,”
And a’ her sweets that charm our een,
In strains that ne’er shall fail’ I ween,
	Our sauls to cheer;
For in a crack they drive the spleen
	Frae a’ that hear.


In spring, when Sol span out the day,
And Boreas’ blasts were fled away,
Sax rood of ground Rab o’er could lay,
	Syne on his reed,
At night untir’d fine could he play,
	But oh! he’s dead.


He lash’d the canting whining race,
Wha wear an artificial face,
Tho’ blest wi’ kirks, or out of place
	Rab did na care,
Hypocrisy weel could he trace
	And ne’er did spare.


His Ordination, Holy Fair,
And Priest wha like a calf did rair,
Some thought these hurt religious fair,
	That heav’nly maid,
But what was wrang Rab wadna spare,
	For a’ they said.


And whan he sings the Holy Fair,
W… of sense can ca’ it mair?
Tho’ bigotry, with ideot-stare,
	Offence may tak;
Yet pure religion when or where
	Does he attack?


Na, na, religion heav’n sair!
Thy dictates Rab did ay revere,
And tho’ he did na practise mair,
	Yet ah! waes me,
Whare dwalis the man that disna err
	As well as he?


He paints religion a’ sae sweet,
As true devotions sire may beet;
But satirizes most complete
	And sair taks aff,
A’ them that mix our heav’nly wheat
	Wi’ common c’aff.


Let poor dull rhymers rack their brains,
His native wild enchanting strains
Shall charm a’ Caledonia’s swains,
	Baith young and aul,
While mountain daisies deck our plains
	They’ll touch the saul.


And far awa, as weel’s at hame,
His merit shall be kend the same;
For time shall dry up baith the Thame
	And silver Tweed,
Before he shall destroy the fame
	Of him now dead.


Ambitious fools hae mony a time
Striven to outrival Robin’s rhyme;
But pith was wanting – poor dull chime
	Was a’ they gied;
Rab was the boy hit a’ theing prime,
	But ah! he’s dead.


Parnassus’ bastards, mony a gelping,
Hae deev’d us wi’ their dinsome yelping;
But his sweet sangs ne’er needed hrlping,
	To send to prent;
For rank and file his words cam’ skelping,
	Afore he kent.


Some feckless rhymers’ wit’s sae scarce
They’re pinch’d to screed and antrim verse;
But Robin’s fertile muse was fierce,
	And stout and baul’:
Her pithy style had power to pierce
	The very saul.


His death wi’ far mair grief we learn,
That on reflection we discern,
Lang might we had our fav’rite bairn,
	In health fu’ sicker:
O curse the fallows did him learn
	To toom the bicker.


O dool! that e’er he left the plough,
And took him to a trade was new,
And bade sweet Temperanse adieu!
	For wae to tell,
Then up like Watson’s sock he flew,
	And tint himsell.


But let us not, as chatt’ring fools,
Proclaim his fauts, like envy’s tools
Wha seek out darkness just like owls,
	Dark, dark indeed;
But a’ his failings co’er wi’ mools,
	Now since he’s dead.


As bright a genius death has torn,
Frae us, as Scotia did adorn,
Like Phœbus whan he springs at morn,
	Clear was his head;
What news could mak’ us mair forlorn,
	Than Robin’s dead?


The winter nights I’ve cheer’d by turns,
Wi’ Ramsay, Fergusson, and Burns:
The first twa cauld are in their urns,
	Their sauls at rest:
Now weeping Caledonia mourns,
	Him last and best.

William Hamilton Reid

Poem Theme: Robert Burns

William Hamilton Reid's other poems:
  1. Elegy, supposed to be written on a Waste near the Charter-house, London
  2. Invocation to Melancholy
  3. Ode to Reflexion
  4. The Tomb of Shere, an Oriental Elegy
  5. Stanzas on Happiness

Poem to print Print


Last Poems

To Russian version


English Poetry. E-mail eng-poetry.ru@yandex.ru