Poem by Robert Burns

* * *

As I was a wand’ring ae midsummer e’enin’,
  The pipers and youngsters were making their game;
Amang them I spied my faithless fause lover,
  Which bled a’ the wounds o’ my dolour again.

Weel, since he has left me, may pleasure gae wi’ him;
  I may be distress’d, but I winna complain;
I flatter my fancy I may get anither,
  My heart it shall never be broken for ane.

I could na get sleeping till dawin’ for greetin’,
  The tears trickled down like the hail and the rain;
Had I na got greetin’, my heart wad a broken,
  For, oh! love forsaken’s a tormenting pain.

Altho’ he has left me for greed o’ the silier,
  I dinna envy him the gains he can win;
I rather wad bear a’ the lade o’ my sorrow
  Than ever hae acted sae faithless to him.

Weel, since he has left me, may pleasure gae wi’ him,
  I may be distress’d, but I winna complain;
I flatter my fancy I may get anither,
  My heart it shall never be broken for ane.

1. Their Groves O’ sweet Myrtle
2. The Bonnie Wee Thing
3. As Down the Burn They Took Their Way
4. Gala Water
5. Stay My Charmer

Print

4733 Views

Last Poems

To Russian version