Poem by Robert Nicoll

My Auld Gudewife

THERE'S nane like you—there's nane like you:
    The youngsters blithe around us now
Are bonnie a', baith grit an' sma';
    But, auld gudewife, there's nane like you.

Nae doubt they're dear to ither hearts;
    But since thae bairns atween us grew,
You're mair than a' the earth to me—
    There's nane like you—there's nane like you.
        Chorus—There's nane like you—there's nane
            like you, &c.

Within my arms ye now ha'e lain
    For springs an' summers forty-two:
You've cheered my grief an' shared my joy—
    There's nane like you—there's nane like you.
        Chorus—There's nane like you—there's nane
            like you, &c.

Ye ance were fair as ony here—
    Your cheek as fresh—your een as blue;
But wither'd, wrinkled as ye are—
    There's nane like you—there's mane like you.
        Chorus—There's nane like you—there's nane
            like you, &c.

Ye mind, gudewife, when we could loup
    And dance as they are dancin' now;
I lo’ed ye then—I lo’e ye yet—
    There's nane like you—there's nane like you.
        Chorus—There's nane like you—there's nane
            like you, &c.

A meikle share o' love we've had
    The warld as we've warsled through:
My auld heart dances thinking o't—
    There's nane like you—there's nane like you.
        Chorus—There's nane like you—there's nane
            like you, &c.

There come your childer an' their joes
    Wi' daffin unco tired I trow:
Cleek hame wi' me, my auld gudewife—
    There's nane like you—there's nane like you.
        Chorus—There's nane like you—there's nane
            like you:
    The youngsters blithe around us now
        Are bonnie a', baith grit an' sma':
    But, auld gudewife, there's nane like you.

1. The Battle Word
2. The Wooing
3. The Beloved One
4. The Making o' the Hay
5. The Ha' Bible

Print

1558 Views

Last Poems

To Russian version