Poem by Carolina Oliphant, Lady Nairne

What Do Ye Think o' Geordie Noo?

 Duet Sung by the Laird and His Daughter Mysie

Laird.
"O what do you think o' Geordie noo?
O what do you think o' Geordie noo?
Come daughter mine, come tell me true,
O what do you think o' Geordie noo?"

Mysie.
"O Geordie we think nought ava,
O what has brought him here at a'?
We hae ae king, nae need o' twa,
Sae Geordie ye maun march awa'."

Laird.
"Oh daughter mine, I'm wae to see,
Ye speak sae light o' majestie;
Now Geordie's king o' kingdoms three,
Ye maun obey baith him and me."

Mysie.
"O faither dear, I need na say,
Your will's a law I'll aye obey,
But sure they're wud that can compare
King Geordie wi' auld Scotland's heir!"

Laird.
"Fair faced, I grant, the Stuarts a' be,
But, oh, they're fu' o' treacherie;
O, Mysie, lass, ye little ken
The drift o' Cavaliering men!"

Mysie.
"We're wae to see a foreign loon,
Come over here to tak' our croun
Outlandish gibberish on his tongue
No understood by auld or young."

"O Geordie's stout, and unco braid;
He's no like Charlie in his plaid;
To see him dance, to hear him sing
O sure he is our rightfu' king!"

Laird.
"It's no to sing, nor yet to dance,
That we will tak' a king frae France.
A bird that's ta'en frae an ill nest
It aye will do like a' the rest."

Mysie.
"For nae offence that we can see,
Up in a rage will Geordie flee;
The flames get then his periwig,
That's no denied by ony Whig."

Laird.
"Aweel, aweel, and what's a' that,
To them wha promise and draw back?
Nae wiser by adversitie,
O! tyrants a' the Stuarts wad be."

Mysie.
"O, adverse winds round them did blaw,
And he has seen and felt it a';
O, dinna believe ill tales are true,
For that we all are apt to do."

Laird.
"It's true the sun will melt the snaw,
It's true that time will wear awa',
It's true that nicht will follow day,
O, Mysie, ther's truth in a' I say.

"O, Mysie, lass, dry up thy tears,
And think nae mair o' cavaliers:
To fecht 'gainst heaven is a' in vain,
The Stuarts will never reign again."

Together.
"Auld Scotland is unconquered land,
And aye for freedom made a stand;
So let us a' in that agree,
Hurra, hurra, for liberty!

1. Songs of My Native Land
2. There Grows a Bonnie Brier Bush
3. Fell He on the Field of Fame
4. Caller Herrin'
5. Would You Be Young Again?

Print

1194 Views

Last Poems

To Russian version