Robert Nicoll (Роберт Николь)

My Auld Gudewife

THERE'S nane like you—there's nane like you:
    The youngsters blithe around us now
Are bonnie a', baith grit an' sma';
    But, auld gudewife, there's nane like you.

Nae doubt they're dear to ither hearts;
    But since thae bairns atween us grew,
You're mair than a' the earth to me—
    There's nane like you—there's nane like you.
        Chorus—There's nane like you—there's nane
            like you, &c.

Within my arms ye now ha'e lain
    For springs an' summers forty-two:
You've cheered my grief an' shared my joy—
    There's nane like you—there's nane like you.
        Chorus—There's nane like you—there's nane
            like you, &c.

Ye ance were fair as ony here—
    Your cheek as fresh—your een as blue;
But wither'd, wrinkled as ye are—
    There's nane like you—there's mane like you.
        Chorus—There's nane like you—there's nane
            like you, &c.

Ye mind, gudewife, when we could loup
    And dance as they are dancin' now;
I lo’ed ye then—I lo’e ye yet—
    There's nane like you—there's nane like you.
        Chorus—There's nane like you—there's nane
            like you, &c.

A meikle share o' love we've had
    The warld as we've warsled through:
My auld heart dances thinking o't—
    There's nane like you—there's nane like you.
        Chorus—There's nane like you—there's nane
            like you, &c.

There come your childer an' their joes
    Wi' daffin unco tired I trow:
Cleek hame wi' me, my auld gudewife—
    There's nane like you—there's nane like you.
        Chorus—There's nane like you—there's nane
            like you:
    The youngsters blithe around us now
        Are bonnie a', baith grit an' sma':
    But, auld gudewife, there's nane like you.

1. The Toun Where I Was Born
2. Our Auld Gudeman
3. Down by the Wood
4. The Muir o' Gorse and Broom
5. The Ha' Bible

Распечатать (To print)

Количество обращений к стихотворению: 1591

Последние стихотворения

To English version