Hector Macneill

* * *

'Lassie wi' the gowden hair,
Silken snood, and face sae fair;
Lassie wi' the yellow hair,
    Think nae to deceive me!
Lassie wi' the gowden hair,
Flattering smile, and face sae fair;
Fare ye weel! for never mair
    Johnie will believe ye!
O no! Mary bawn, Mary bawn, Mary bawn,
O no! Mary bawn, ye'll nae mair deceive me!

Smiling; twice ye made me troo;
Twice -- (poor fool!) I turn'd to woo;
Twice, fause maid! ye brak your vow,
    Now I've sworn to leave ye!
Twice, fause maid! ye brak your vow,
Twice, poor fool! I've learn'd to rue--
Come ye yet to mak me troo?
    Thrice ye'll ne'er deceive me!
No! no! Mary bawn, Mary bawn, Mary bawn!
O no! Mary bawn, thrice ye'll ne'er deceive me.

Mary saw him turn to part;
Deep his words sank in her heart ;--
Soon the tears began to start--
    'Johnie, will ye leave me!'
Soon the tears began to start,
Grit and gritter grew his heart!--
'Yet ae word before we part,
    Luve cou'd ne'er deceive ye!
O no! Johnie dow, Johnie dow, Johnie dow,
O no! Johnie dow -- luve cau'd ne'er deceive ye.'

Johnie took a parting keek,
Saw the tears hap owre her cheek!
Pale she stood, but coudna speak!--
    Mary's cur'd o' smiling.
Johnie took anither keek--
'Beauty's rose has left her cheek!--
Pale she stands, and canna speak.
    This is nae beguiling.
O no! Mary bawn, Mary bawn, dear Mary bawn,
No, no! Mary bawn -- Luve has nae beguiling.