Hector Macneill

* * *

O Johnie! can you pity ony!
Is your heart yet turn'd to stane?
Can ye calmly hear that Menie
Ne'er will see your face again?
Here I've wander'd wae and weary;
Here I've fought wi' wind and rain;
Here I've sworn your ance loo'd deary
Ne'er will see your face again.

Owre lang hae I pin'd in sorrow!
Owre lang hae I sigh'd in vain;
Hearts, tho' leil, can sometimes borrow
Pride whan treated wi' disdain!
Then tak your smiles and fause deceiving,
Gie them to a heart mair true!
-- Mine, alas! is chang'd wi' grieving!
Torn by faithless luve and you.

Yet ae word before our parting,
(Since for ever mair we part)
In the midst o' pleasure -- starting,
Menie's wrangs will wring your heart!--
For Johnie gin ye pity ony,
Gin your hearts no turn'd to stane,
Ye maun rue the cause that Menie
Ne'er will see your face again.